मुंबई : मुख्यमंत्री देवेंद्र फडणवीस यांच्या एक ऑगस्टपासून सुरू होणाऱ्या प्रस्तावित महाजनादेश यात्रेचा सुसज्ज रथ मंगळवारी (३० जुलै) मुंबईत भारतीय जनता पक्षाच्या प्रदेश कार्यालयातून प्रदेशाध्यक्ष महसूलमंत्री चंद्रकांत पाटील यांनी हिरवा झेंडा दाखवून रवाना केला.
या वेळी उत्तर प्रदेशचे माजी राज्यपाल राम नाईक, उच्च शिक्षणमंत्री विनोद तावडे, प्रदेश सरचिटणीस आमदार सुजितसिंह ठाकूर, प्रदेश सचिव संजय उपाध्याय, प्रदेश माध्यम विभागप्रमुख व प्रवक्ते केशव उपाध्ये, तसेच प्रवक्ते अवधूत वाघ उपस्थित होते.
या वेळी बोलताना प्रदेशाध्यक्ष पाटील म्हणाले, ‘भाजप राष्ट्रीय अध्यक्ष आणि गृहमंत्री अमित शाह आणि मध्य प्रदेशचे माजी मुख्यमंत्री शिवराजसिंह चौहान यांनी यापूर्वी यात्रांसाठी वापरलेल्या रथांचा वापर मुख्यमंत्र्यांच्या महाजनादेश यात्रेसाठी करण्यात येत आहे. शिवराजसिंह चौहान यांनी सात वर्षे मध्य प्रदेशात जनसंपर्कासाठी हा रथ वापरला होता. त्याची दुरुस्ती करून मुख्यमंत्री देवेंद्र फडणवीस यांच्या महाजनादेश यात्रेसाठी वापरण्यात येणार आहे.’
महाजनादेश यात्रेसाठीचे रथ पक्षाचा विचार जनतेमध्ये पोहचवतील आणि आगामी विधानसभा निवडणुकीत विजय खेचून आणतील, असा विश्वास असल्याचे नाईक यांनी नमूद केले.
महाजनादेश यात्रेला राष्ट्रसंत तुकडोजी महाराजांचे कर्मस्थान असलेल्या अमरावती जिल्ह्यातील मोझरी येथून एक ऑगस्टपासून प्रारंभ होणार आहे. लोकशाहीर अण्णा भाऊ साठे यांच्या जयंतीचे आणि लोकमान्य टिळक पुण्यतिथीचे औचित्य साधून सुरू होणाऱ्या या यात्रेचा समारोप ३१ ऑगस्टला नाशिक येथे होणार आहे. विदर्भ आणि उत्तर महाराष्ट्र येथून एक ते नऊ ऑगस्टदरम्यान पहिला टप्पा होणार असून, या भागातील एकूण १४ जिल्ह्यांत ही यात्रा जाणार आहे. या दरम्यान ५७ विधानसभा मतदारसंघातून एक हजार ६३९ किलोमीटरचा प्रवास करण्यात येणार आहे. पहिल्या टप्प्याचा समारोप नंदुरबार येथे होणार आहे.
यात्रेचा दुसरा टप्पा १७ ऑगस्टला सुरू होईल. दुसऱ्या टप्प्यांत ही यात्रा १८ जिल्ह्यांतील ९३ विधानसभा मतदारसंघात दोन हजार ७४५ किलोमीटर एवढा प्रवास करणार आहे. यात्रेचा एकूण प्रवास ३२ जिल्ह्यांतून चार हजार ३८४ किलोमीटर एवढ्या अंतराचा असणार आहे. दोन्ही टप्पे मिळून १५० विधानसभा मतदारसंघांमधून ही यात्रा जाणार आहे. या दरम्यान ८७ मोठ्या सभा, ५७ स्वागत सभा होणार आहेत. या शिवाय एकूण २३८ पेक्षा अधिक गावांमध्ये स्वागत स्वीकारून यात्रा नाशिक येथे पोहोचेल.
